Польшча і Беларусь пашыраюць супрацоўніцтва ў галіне адукацыі

Польшча Беларусь

У Міністэрстве адукацыі 14 сакавіка адбылася сустрэча з дэпутатамі Сейма Рэспублікі Польшча на чале з сустаршынёй Польска-Беларускай парламенцкай групы Адамам Андрушкевічам. Беларускі бок прадстаўлялі намеснік міністра адукацыі Р.С.Сідарэнка, прадстаўнікі Нацыянальнага сходу Рэспублікі Беларусь,супрацоўнікі галіновага міністэрства. У сустрэчы прымаў удзел Надзвычайны і Паўнамоцны Пасол Рэспублікі Польшча ў Рэспубліцы Беларусь Конрад Паўлік.

— Адносіны паміж нашымі краінамі маюць вельмі даўнюю гісторыю  і прыўнеслі нашым народам вялікі плён, — адзначыла на пачатку сустрэчы Раіса Станіславаўна Сідарэнка.— Калі прааналізаваць наша супрацоўніцтва,  і аб якім ўзроўні нашых узаемаадносін мы сёння ні гаварылі б, усюды нашы дарогі перасякаюцца,  з кожным разам нашы сувязі мацнеюць. Гэта зразумела і лагічна.У нас адна агульная задача – выхоўваць новае пакаленне грамадзян, выхаваных на прынцыпах дружбы,узаемапаразумення паміж нашымі краінамі, каб і надалей развіваць цёплыя сяброўскія, культурныя і дзелавыя адносіны.

Тэмамі для абмеркавання на сустрэчы сталі пытанні аб преспектывах развіцця беларуска-польскага супрацоўніцтва ў сферы адукацыі, рэалізацыі права прадстаўнікоў нацыянальных меньшасцей на атрыманне адукацыі на польскай мове ў Беларусі.

Працягваючы размову Р.С.Сідарэнка адзначыла, што ў сферы адукацыі Беларусі і Польшчы, непасрэдна паміж навучальнымі ўстановамі ўсталяваліся цесныя і прадукцыйныя сувязі, якія дазваляюць узаемна ўзбагачаць адукацыйную галіну дзвюх краін. Так,у прыватнасці, толькі прамых дагавораў паміж УВА Беларусі і Польшчы заключана на сённяшні дзень больш за 220.

У канцы мінулага года адбылася знамянальная падзея ва ўзаемаадносінах дзвюх краін — падпісанне пагаднення паміж урадамі Беларусі і Польшчы, што дазволіла пашырыць гарызонты супрацоўніцтва і тым самым актывізаваць абмен студэнтамі, аспірантамі, педагогамі, павялічыць колькасць і пашырыць тэматыку сумесных адукацыйных і навуковых праектаў. У гэтым задзейнічаны ўстановы дашкольнай, агульнай сярэдняй, вышэйшай і дадатковай адукацыі дзяцей і моладзі. 

У частцы перамоў наконт прававога стану нацыянальных меньшасцей Беларусі, у тым ліку магчымасці выбару іх прадстаўнікамі мовы выхавання і навучання, было адзначана, што гэтыя палажэнні рэгулююцца шэрагам  заканадаўчых дакументаў, у першую чаргу Канстытуцыяй Рэспублікі Беларусь, а таксама Законам “Аб нацыянальных меньшасцях у Рэспубліцы Беларусь” і Кодэксам аб адукацыі ў частцы рэалізацыі права карыстацца роднай мовай.

Як падкрэсліла Р.Сідарэнка,  у сістэме адукацыі нашай краіны прадстаўлена права ўсім грамадзянам на атрыманне ведаў на роднай мове. Што тычыцца непасрэдна вывучэння польскай мовы ў нашай краіне, то сёння функцыянуюць дзве школы (сярэдняя школа №36 г.Гродна, сярэдняя школа №8 Ваўкавыска), дзе 80% урокаў выкладаецца на польскай мове. Вывучэнне польскай мовы адбываецца таксама ў 10 УВА нашай краіны. Акрамя таго, у многіх  школах Беларусі арганізаваны  факультатыўныя заняткі, на якіх усе жадаючыя могуць вывучаць польскую мову.

Калі браць іншыя накірункі развіцця супрацоўніцтва паміж Беларуссю і Польшчай, то яно імкліва развіваецца ў сферы прафесійнай, спецыяльнай адукацыі, навуковай дзейнасці. Так, у прыватнасці, у прафесійнай адукацыі найбольш актыўна развіваюцца сувязі паміж Рэспубліканскім інстытутам прафесійнай адукацыі і Познаньскім цэнтрам бесперапыннай і практычнай адукацыі. Асабліва наблізіліся гэтыя ўстановы ў падрыхтоўцы сумесных праграм прафесійнай адукацыі, узаемным абмене методыкамі навучання, у развіцці руху WorldSkills.

Прадстаўнікі дзвюх краін закранулі пытанне маладзёжных абменаў, якое сёння вельмі актуальнае. З цягам часу гэты накірунак супрацоўніцтва не зменшыў тэмпаў, а становіцца ўсё больш інтэнсіўным. Толькі за апошнія два гады у рамках праграм міжуніверсітэцкага акадэмічнага абмену 330 студэнтаў беларускіх УВА прайшлі навучанне ў Польшчы. У рамках маладзёжнага абмену наша моладзь прымае ўдзел у шматлікіх сумесных мерапрыемствах, міжнародных семінарах, канферэнцыях, еўрапейскіх праграмах.

Адам Андрушкевіч разам са сваімі калегамі падзяліліся сваім вопытам ў прадастаўленні правоў і стварэнні ўмоў для вывучэння роднай мовы нацыянальным меньшасцям, якія пражываюць на тэрыторыі Польшчы, і перш-наперш беларусам. Госці з Польшчы выказалі пажаданне запазычыць напрацоўкі беларускіх калег у гэтым накірунку.

Ала КЛЮЙКО

http://edu.gov.by/news